Espressions politichis de “cuistion furlane” tra episodis tatics des ultimis elezions e prospetivis


A son za mês che e je in vore une discussion, dispès interessante, su cemût che la “cuistion furlane” e pues cjatâ une espression a nivel politic.
Un prin pas al è stât chel di ricognossi che un moviment unitari, che al tiri dentri eletôrs e esponents di cualsisei posizion politiche, cun in comun l’amôr pal Friûl e pe lôr identitât, nol varès vût risultâts e che invezit di unî, al sarès restât debil e/o dividût, cemût che al jere dimostrât de storie dal Moviment Friûl e dai partîts che a àn cirût di cjapâ il so puest.
La prove dal Moviment Friûl di tornâ in cjamp in chestis ultimis elezions, che e je lade strucje, e je une conferme empiriche che no lasse plui nissun dubi su la coretece de leture che e viôt la inadeguatece dal “partît di racuelte”.
Cussì e je stade in gjenerâl une polarizazion des personis impegnadis a nivel politic par une idee di Friûl (la gjenericitât de espression e je volude) che, magari dopo cualchi inciertece, si son plaçadis a centriçampe o a centridiestre.
A centriçampe si è formulât il progjet di Un Friûl Diferent, che si è impegnât prin di dut a dâ dongje ideis, resonaments e personis par cjatâ rispuestis gnovis e progressistis ae “cuistion furlane”. Un Friûl Diferent nol à formât une liste par presentâsi aes elezions, ma si è confrontât cu la candidade presidente de Regjon Serracchiani, firmant cun jê un document di acuardi, al à partecipât ae campagne eletorâl cun incuintris publics e al à sostignût in particolâr siei fondadôrs che a jerin candidâts in partîts dal centriçampe (in particolâr Cristiano Shaurli, Angelo Tomasin e Lorenzo Croattini).
A centridiestre il panorame “furlanist” al è stât plui articolât, soredut a nivel des elezions provinciâls di Udin:
- il MAF/Identitât e Inovazion al à strent un acuardi cui candidâts di centridiestre: par Tondo in Regjon, confluint te liste Autonomia responsabile, par Fontanini in Provincie, cun liste proprie;
- la Lega Nord e à presentât diviers candidâts cuntune fisionomie politiche “furlaniste”;
- il Front Furlan, che nol à vût la fuarce par presentâsi aes regjonâls e ae fin nol à acetât di aleâsi cun Tondo o cun Un’altra regione, al è rivât a presentâsi di bessôl tes elezions provinciâls di Udin.
Cheste situazion, di une bande e mostre fûr di ogni dubi la impuartance di un eletorât moderât sensibil ae cuistion furlane, tant che ancje un candidât antifurlan come Tondo al à cirût di riclamâ i chei vôts cu la liste “furbe” Autonomia responsabile, formade in part di autonomiscj dal MAF, in part di fedêi a Tondo cence nissune credibilitât in fat di autonomisim; di chê altre bande e mostre che a son dificoltâts tal meti dongje un moviment furlan conservadôr moderât che al vedi une capacitât di organizazion politiche e di elaborazion di une concezion clare e atuâl di Friûl.
Di fat la clarece di ideis e di propuestis e je stade dispès sacrificade ae tatiche eletorâl, cualchi volte intivant un bon sucès, cualchi altre puartant al faliment.
Il MAF/Identitât e Inovazion al jere sigûr di no vê la fuarce di tirâ sù lis firmis par presentâsi aes regjonâls, duncje, valutant che al varès vinçût Tondo, al à acetât une aleance, che però e à dât al eletorât un messaç incoerent: intant che al è di preseâ il sfuarç di formulazion di une linie politiche furlane conservadore, fat tai ultins agns di Identitât e Inovazion, si pues dome che restâ disorientâts de aleance cun Tondo, che, di lâ de sô pratiche politiche sotane ai interès centraliscj, in campagne eletorâl al à cjapât posizion cuintri de autonomie dal Friûl – VJ in favôr de macroregjon padane e al à declarât a clâr che lis normis di tutele de lenghe furlane a son “una cazzata”.
Ancje a nivel provinciâl il MAF/Identitât e Inovazion al è restât vitime dal so taticisim: pûr sostignint Fontanini, che al à une credibilitât autonomiste une vore plui alte di chê di Tondo, e cundut che al vedi intivât la aleance cul vincidôr, il MAF/Identitât e Inovazion al à vût un risultât eletorâl falimentâr (2,07%, penultin dai partîts, plui alt dome di Chiudiamo la Provincia – Scelta adesso). In efiets al à zovât dal sigûr a Fontanini, dantji une “conferme” di furlanetât, buine soredut par contrastâ la menace dal Front Furlan, ma nol à racuelt vôts: di fat i eletôrs “furlaniscj conservadôrs sodisfats” a àn votât il partît di Fontanini, vâl a dî la Leghe, invezit i eletôrs “furlaniscj conservadôrs insodisfats” a àn votât Front Furlan.
In definitive il MAF/Identitât e Inovazion, cundut che al sedi il moviment di centridiestre che tai ultins agns al à lavorât di plui par dâsi une struture e ancje un furniment ideâl, al è restât vitime di sieltis tatichis faladis.
La Lega Nord, feride a muart dai scandui dal partît centrâl e di une parabule che aromai e dimostre il faliment dai obietîfs che le vevin fate nassi, e je rivade a tignî bot e a restâ presinte: il merit al è in buine part te sielte di candidâts une vore leâts al teritori, che a àn fat une campagne eletorâl cence scjas, rivant però a fâ valê la lôr imagjin e credibilitât. La tatiche di “bas profîl” e je stade juste, par vie che ju à premiâts salacor di plui di ce che e varès fat une condote plui agressive, che ju varès obleâts a dâ un grum di justificazions in plui. Di fat i “furlaniscj” che a son te Leghe si cjatin intune posizion delicade, dal sigûr di eterodossie rispiet al leghisim milanocentric e di incoerence, viodude la incompatibilitât tra macroregjon padane e autonomie dal Friûl.
In struc, ancje se il risultât al è stât chel mancul piês, si pues previodi che la Leghe e ledi al mancul, scjafoiade de crisi che e tocje ducj i partîts talians e, ca di nô, de inconsistencis des sôs rispuestis ae “cuistion furlane”: i esponents “furlaniscj” che cumò a son te Lega Nord a varan di cirî stradis gnovis e plui coerentis par lâ indevant.
Il Front Furlan, dopo di une schirie di “relazions pericolosis” cun MAF/Identitât e Inovazion e soredut cun Un’altra Regione, al è il sogjet politic che al à cjatât la posizion “furlaniste” di centridiestre plui coerente, in contestazion cuintri dai aministradôrs in cjarie. Il risultât tes provinciâls di Udin (5,44%), che al puarte in consei il candidât Federico Simeoni, al è dal sigûr positîf, ma al rapresente ancjemò dome une piçule part dal potenziâl dal eletorât “furlanist conservadôr”.
In contrast cul risultât positîf, si scuen notâ che tra dutis lis fuarcis viodudis fin cumò e je chê cun mancul organizazion e cuntune elaborazion mancul madure de “cuistion furlane”.

Lis prospetivis de politiche pal Friûl a passin par une strade di çampe, là che si à di passâ de fase di elaborazion concetuâl e di poie a chê di organizazion di une vere fuarce politiche, presinte in maniere capilâr tal teritori, e par une strade di diestre, che e à di lassâ indaûr i episodis de tatiche par cjatâ un insuazament sedi teoric che organizatîf plui crodibil.

Tiere Viere

Une esperience par fânus capî che il nestri model di vite, nol è l'unic pussibil in Friûl: Marina Tolazzi, za diretore di Radio Onde Furlane, agns indaûr e à decidût di tornâ tes sôs monts, a fâ famee e a vivi su la tiere. Lunis che al ven jê e la sô famee a vierzin lis puartis de lôr cjase, che e je deventade il lozament agrituristic Tiere Viere. Compliments di cûr.


Jude vs PDL


Dal 2009 al è un program di traduzion automatiche dal talian al furlan: si clame Jude.
In dut chest timp la Zonte Tondo e à fat come se chest tradutôr nol fos, e à fat come se la lenghe furlane no fos.
Cumò però il PDL al à cûr di domandâ il vôt dai furlans ancje cun manifescj scrits tun furlan a la Diu ju stramaledissi.
Chest video ca sot al mostre cuâl che al è il risultât se si dopre il tradutôr Jude: cuant che la inteligjence artificiâl e jude chê naturâl!




Viaç tal Friûl di Magance a Felet




Sabide che e ven (ai 16 di Fevrâr), aes 10.30 te jentrade dal municipi a Felet e sarà la presentazion de mostre "Viaç tal Friûl di Magance": une biele mostre cun ilustrazions di Luigino Peressini, tescj par furlan, talian e inglês. A compagnaran la cjacarade su aganis, orcolats, maçarots e vie indevant lis musichis, pardabon magjichis, dal mestri Gianfranco Lugano.

Pal ben dal NESTRI Friûl


No san cemût che si scrîf "NESTRE", no san cemût che si scrîf "specialitât REGJONÂL", ma il probleme al è che no dome no san cemût che si scrîf, propit ur mancje il concet di Friûl e di regjon autonome. Liberâsi di Berlusconi, liberâsi di Tondo e de sô zonte, fâur paiâ di sachete i dams che a àn produsût, a son prioritâts pe NESTRE cressite sociâl e civîl.

E se...


E se in Friûl al fos un progjet politic che al puarte pardabon su la taule i problemis dal Friûl?

E se un pocje di int si des dongje par domandâ che la politiche si trasformi di gjestion lontane dal podê in democrazie di prossimitât?

E se si fondàs une societât furlane su la pluralitât linguistiche e identitarie invezit che sul nazionalisim talian?

E se si viodès il teritori tant che une risorse di valorizâ e di doprâ pal ben de popolazion e dai furlans che a vignaran, e no dome come oportunitât di speculazion?

E se propit dal Friûl o tacassin a movi la ricjece des concentrazions finanziariis ae economie reâl, fondade in maniere significative su la rispueste aes domandis dal marcjât locâl?

E se intant che l'acentrament statâl al menace il benstâ sociâl, la istruzion, i servizis aes fameis, aes feminis... o domandassin che chestis competencis a fossin passadis ad in plen a nivel locâl?

Chescj "sês" no son plui eventualitâts, a son i ponts di fonde di un progjet, par rivâ a Un Friûl Diferent

Il marcjât de lenghe furlane


Vuê e je stade la conference stampe clamade di Radio Onde Furlane e Radio Spazio 103 par denunziâ i dams che i tais aes risorsis dedicadis ae lenghe furlane a fasaran tal cjamp radiotelevisîf: mancul servizis, plui disocupazion.
No ai podût lâ ae conference, ma mi sint di zontâ une riflession.
Cui che nol cognossès ben la situazion furlane (e o pensi che pardabon la plui part dai furlans no le cognossin) al podarès pensâ: "Al è timp di crisi, parcè no si varessial di taiâ ancje sul furlan? E po chestis radios, parcè no stano sù cu lis lôr gjambis? Parcè àno di domandâ la caritât? Che si nicin e che a stedin sul marcjât"
Cui che al resonàs cussì, se il Friûl al fos intune situazion normâl, a varès ancje reson: ma no sin intune situazion normâl.
Il fat al è che si fevele tant di ducj chei milions (che in realtât a son une miserie) che i ents publics a àn spindût  pe lenghe furlane, ma no si fevele di ducj i miliarts che il Stât Talian e lis sôs aministrazion a àn spindût par cuasi un secul e mieç par scancelâ la lenghe furlane.
E stant che o sin in crisi, no vuei fevelâ di lenghe furlane tant che valôr identitari, culturâl, sociâl e v.i., ma come valôr economic: cualsisei lenghe, in cundizions normâls, e cree economie, marcjât, indot. Invezit la Italie, di cuant che e je rivade in Friûl, e à invistît miliarts par distruzi o fâ abortî chel marcjât.
Un marcjât che al varès podût fâ la sô part par gjenerâ ocupazion, ricjece, benstâ.
Cemût si fasial cumò a domandâ a radios, editôrs, cooperativis, associazions, professioniscj di lâ indevant a lavorâ su la lenghe furlane dome daûr des regulis dal marcjât, se il plui alt ent public, cun dute la sô fuarce, si impegne par copâ chel marcjât?
Cemût pretindi, par esempli, che un editôr al sorevivi, se si impedìs par passe un secul ai furlans di jessi alfabetizâts te lôr lenghe?
E che no mi vegni a contâ l'assessôr Molinaro che la lenghe furlane cumò e je curicolâr te scuele: la realtât e je che no si fâs scuasi nuie, come prime. A mancjin i insegnants competents, a mancjin i programs, a mancjin i imprescj didatics, a mancjin i controi: e mancje plui di dut la volontât di fâ lis robis in maniere serie.
E cence intervignî in maniere serie no si permet al marcjât di esisti, e si impedìs di esisti ancje a realtâts virtuosis, come Radio Onde Furlane, che in chescj agns e à pardabon inviât un indot, in tiermins economics, artistics e culturâi.
Il probleme al reste, e al è di concet: pai nestris politics e aministradôrs, prin di ducj Renzo Tondo che al à simpri declarât che i bêçs sul furlan a son butâts vie, i finanziaments pe nestre lenghe a son dome une limuesine par fânus stâ cidins; par nô a son un invistiment indispensabil par creâ plui justizie e ancje plui ocupazion e plui benstâ.
Lis conferencis come chê di vuê a zovin almancul a fâ vignî fûr chestis cuistions, ma la reazion e la soluzion a podaran jessi dome politichis.
Intant, cemût che o vevi za scrit, che Tondo, De Anna e Molinaro si cjapin lis lôr responsabilitâts: leçs no rispietadis, finanziaments blocâts par agns, ancjemò prime che taiâts, professioniscj disocupâts.

Bici!


Dopo un pâr di mês che scuasi no fasevi sport, i voleve propit un biel zîr, 70 km tra cjamps e culinis, cun cualchi cjanton ancjemò cuviert di glace e di nêf.

De Grecie ae Cjargne

A Tumieç, mi àn invidât a fevelâ di traduzions des lenghis classichis al furlan, chest vinars 11 di Zenâr, a 17.30 te sale dal Museu Gortan. Dal sigûr il gno intervent al varà tal cûr il lavôr di traduzion de Odissee di Omêr, fat cun puar Pierluigi Visintin.


...

Ma il spirt ti si à voltât   i miei malans di angosse
a domandâ, di mût   che inmò plui vaìnt jo o suspiri.
Ce in prin e ce daspò,   ce in ultin varaio di dîti?
Di fat un grum di malans   mi àn vût dât i dius dal cîl.
Prin di dut il gno non   cumò us disarai, che voaltris
lu sepis, che jo daspò,   scjampât de dì dal destin,
vuestri ospit o sedi,   purpûr stant di cjase lontan.
O soi Odisseu, il fi   di Laert, che par ogni ingjan
fra i umign o ai non,   al cîl la mê fame e rive.
...