776 - 2018: la bataie no je finide

774 a Pavie di Lombardie: l'esercit franc, sot Carli il Grant, al assedie la capitâl dal ream langobart, e infin le cjape; il re Desideri al reste presonîr, il princip Adalgjisi al scjampe a Bizanzi.

774 su la Livence: l'esercit langobart furlan, sot dal duche Rotgaut, al fâs un maçalizi de armade francje che e vignive a ocupâ il Friûl. Il Friûl al reste libar.

Carli il Grant al coromp un pôcs di nobii furlans par che a convincin Rotgaut a acetâ un armistizi, Carli al ven ricognossût Re dal Langobarts, Rotgaut al reste duche dal Friûl.

* * *

Rotgaut al sa che il sisteme carolin si fonde sul leam personâl jenfri sovran e vassal, invezit il duche dal Friûl langobart al jere espression de nobiltât di chent e nol dipendeve de fedeltât a un sovran lontan.

Ancje se te prime vuere al veve vût miôr di difindi il Friûl e no di judâ il re Desideri a Pavie, Rotgaut al cîr di organizâ une vuere di liberazion cuintri dai Francs.

* * *

776: Rotgaut al ven pandût e acusât di cospirazion dal Pape. Cheste volte l'esercit franc si môf cun dute la sô fuarce. Ducj chei altris che a volevin parâ vie i Francs dal Ream Langobart si tirin indaûr. Dome Rotgaut e i furlans, cun pôcs aleâts, a van incuintri ae lôr ultime bataie, pôc prime di Pasche.

* * *

I furlans a puedin vinci, a puedin pierdi, ma la idee di un Friûl autonom, di un Friûl libar, e reste.

1450 agns di Friûl

O sin sot Pasche: propit dôs Paschis a insuazin il principi e la fin dal Friûl langobart.

Te Pasche dal 568 i Langobarts a lassavin la Panonie par cjapâ la Italie.

Passant lis Alps il prin teirtori che a cjatavin al jere il nestri: la tradizion e dîs che dal çuc di une mont di là che si viodeve su dute la planure il re Alboin i proponeve a Gjisulf di jessi

il Duche di chel prin teritori.

Al è il moment che al nas il Friûl: prime Forum Iulii al jere dome il non di Cividât, che al devente capitâl dal Ducât. In curt il Ducât di Forum Iulii al passarà di jessi il ducât cun capitâl Cividât a jessi il Ducât dal Friûl.

Te sô stesse nassite si viôt il caratar che il Friûl al varà par simpri: Gjisulf nol è un sotan tes mans dal Re, tal cjapâ la autoritât sul ducât al pretint e al oten di tignî cun se lis miôr fameis langobardis e lis mandriis des miôr cjavalis.

Di chel moment il Ducât dal Friûl al sarà in sostance une istituzion confederade al Ream langobart di Italie, al sielzarà scuasit simpri in autonomie il so Duche, al fasarà une politiche, ancje militâr e internazionâl, par so cont.

Il Friûl al nas langobart e autonom: al resterà langobart par doi secui, al restarà leât ae idee de autonomie par simpri.

Analisi gramaticâl de autonomie: dal “jo - lôr”, al “noaltris”...

Te comunicazion e duncje tal imagjinari coletîf contemporani al somee che tal centri di dut al sedi l'individui: la sô identitât/individualitât, i siei dirits, la sô pussibilitât di fâ strade a son suntun plan di isolament e semplificazion estreme. Di une bande l'individui singul, di chê altre il rest dal mont, une cuintriposizion facile: jo - lôr.

Si podarès dî che chest al è il model american e che, al è dibant dî di no, par tantis robis al funzione.

O podìn notâ, cun di plui, che se il “jo” al funzione simpri compagn, il “lôr” al pues cambiâ, daûr dal interès, individuant une categorie plui strente, in gjenar segnade di un caratar negatîf: “lôr” a puedin jessi i imigrâts, i aversaris/nemîs (i rus, i cinês, i islamics...), ma ancje i politics (la caste).

Il “lôr”, tierce persone plurâl, pal solit al è facil di capî, te sô conotazion fuarte e negative; invezit te comunicazion politiche al è pardabon dificil cjatâ rapresentât un “noaltris” che al vedi la stesse misure di clarece, di fuarce e, in câs, di positivitât.

Il “noaltris” nol ven ni definît ni esprimût, ma al ven sotintindût in formulis tant che “America first” o “Prima gli italiani” che in realtât a platin un imbroi: la plui part di chei che a a vegnin clamâts a jessi in cunvigne cun “America first” o “Prima gli italiani” in realtât a son escludûts dal sisteme Americhe, e, in fin dai fats, no son talians e no vegnin tratâts come citadins talians, ma come sotans dal piçul grup di interès che al à mandât ator chel sproc.

Par restâ dongje di nô, pensìn a ce che al sucedarès se il sproc al fos “Prima noi” o “Prima noi italiani”: al è clâr che cussì definît il sproc nol funzionarès, al sarès masse clâr che al è fals.

“Prima noi” al puartarès ae domande automatiche: “Noi chi?” la rispueste e sarès interessante, anzit, e je fondamentâl, ma e je masse pericolose pai politics talians.

“Prima noi italiani” al varès un efiet ancjemò plui paradossâl: pe plui part dai furlans (ma ator par dute Italie nol è tant diferent) i “talians” no sin “noaltris”, ma a son “lôr”, “chei altris”!!!

Cheste piçule analisi gramaticâl dai pronons, nus puarte a cognossi cualis che a son lis realtâts e cuâi che a son i imbrois: “Prima gli italiani” al funzione cu la bausie, in realtât nol identifiche nissune comunitât positive, al vûl dome mandâ un messaç di esclusion di un ciert “lôr”, doprâ la pôre, la frustrazion, la rabie, par butâ il fum tai voi dai eletôrs e fâ che no capissin che in realtât ancje i citadins talians fasin part de categorie “lôr” rispiet ae caste dai politics talians: “lôr” = chei sotans che no decidin e che no àn di decidi nuie.

Par cheste reson o podìn calcolâ che “lôr”, par “noaltris”, a son propit i politics talians, e che o vin di doprâ plui pussibil la prime persone plurâl, “noaltris”, in dute la sô complessitât (noaltris autonomiscj, noaltris furlans, noaltris citadins de regjon, dal stât, noaltris europeans, noaltris oms, noaltris feminis, noaltris lavoradôrs, noaltris zovins, noaltris dal paîs...).

Fâ une politiche tal “nestri” interès al vûl dî jessi simpri pronts a fevelâ di cui che o sin, di cemût che o sin, di ce che o volìn, al vûl dî jessi obleâts a capî che la identitât e je ancje coletive, che e je plurâl, stratificade, incrosade...

La prime persone plurâl nus jude a fâ pal miôr, nus oblee a cjapâ dentri lis personis intune dinamiche di costruzion positive dal “noaltris”, e no di esclusion di altris.

Alore, ai nestris “lôr”, la caste politiche taliane, o podìn dîur ancjemò une volte:

“Nuie di nô, cence di nô”

1077 - 1977 - 2018

Aeroport de Barcelona

Vuê o ven de Catalogne in Friûl, par votâ domenie e dopo tornâ in Catalogne.

O pensi che al sedi pardabon impuartant ogni vôt pal Pat pe Autonomie.

Votilu e fasilu votâ.

Par fâsi capî al è plui facil fevelâ di bêçs, ma sot e je une cuistion di civiltât.

Il sucès dal Pat pe Autonomie al dismovarà dal sigûr lis solitis critichis: autonomiscj = cjampaniliscj = int sierade = egoiscj. Il sisteme politic talian al è usât a justificâsi cussì, e ancje a ofindi cuant che al piert, invezit di mendâsi.

Alore o dîs za un pâr di robis: dî che i furlans a son sierâts e egoiscj tal moment che a son jenfri lis popolazions cu la plui alte partecipazion a struturis e a iniziativis di solidarietât e cuant che a àn simpri il record di donazion di sanc, par dî une, al vûl dî no volê capî nuie di nô, no meretâ nancje une rispueste.

Po dopo: la cuistion dai bêçs des tassis e je clare e facile di capî, ma par nô la cuistion fondamentâl e je cemût che i bêçs a vegnin doprâts, o miôr cemût che a vegnin invistîts, e je une cuistion di civiltât e no podìn plui rassegnâsi a fâ part de “civiltât” politiche taliane.

Civiltât politiche taliane, vuê plui di simpri, al vûl dî:

• premiâ la clientele, la ineficience fedêl ae prepotence;
• fâ ancje fente di cambiâ ancje dut, ma impedî cualsisei progrès;
• centralizâ dutis lis risorsis par gjavâlis dal control des comunitâts;
• refudâsi di ricognossi che lis carateristichis principâls de Italie a son la complessitât, la diversitât interne, la disunion, e che no son un difiet ma une ricjece;
• omologâ, ignorâ, instupidî, distruzi il patrimoni identitari e culturâl.

Chest sisteme al è sostignût:

• di un centridiestre e di un centriçampe che a son compagns tra di lôr e no àn plui nuie di dî;
• di une Leghe che e çavarie assurditâts, ma che te stesse maniere che no à fat nuie pal federalisim, no fasarà nuie nancje cuintri de imigrazion, anzit i conven che a 'nd sedi tante e mâl organizade;
• di une diestre “estreme” che e berghele che si steve miôr sot dal Duce, fasint fente di no savê che il fassisim al jere il domini prepotent dai incompetents e dai corots, al servizi dai parons di simpri;
• di une çampe “inteletuâl” che no rive a mendâsi des sôs formis mentâls nazionalistis e di diestre, ereditadis di desenis di agns di alienazion culturâl e di mancjance di comprension de Italie (lessino a studiâ Pasolini...);
• di un M5S, centralist za te sô struture interne, inviât a deventâ “democristian” e “caste privilegjade” ancjemò prime di vê pardabon il podê in man (al è za sucedût cu la Leghe, cul M5S al sarà compagne ancje plui svelt).

Il Friûl nol è e nol vûl fâ part di chest sisteme.

La veretât e je che i furlans a son simpri stâts e a saran simpri autonomiscj. A àn votât par desenis di agns partîts talians, contaminâts a fuart di autonomisim tes lôr rapresentancis locâls, te convinzion che e fos la sielte plui eficiente, intune suaze storiche diferente di vuê.

Cumò invezit a tachin a viodi, e a viodaran simpri di plui, che il Pat pe Autonomie e je la uniche sielte che e permeti di dâ valôr a une “civiltât dal lavôr fat ben” e no a une “civiltât dai furbos”.

E la sperance e je che o podìn jessi di esempli ancje pe Italie, chê vere, chê fate di diferencis e complessitâts che il sisteme politic nol vûl viodi.